Ալեքսեյ Մակարյան

Պատմական Գիտությունների Դոկտոր

Կենսագրություն

Ալեքսեյ Արշալույսի Մակարյանը ծնվել է 1040թ. փետրվարի 17-ին Երեւան քաղաքում, մանկավարժի ընտանիքում: Երեւանի #10 միջնակարգ դպրոցն ավարտելուց հետո 1956թ. ընդունվել է Երեւանի պետական համալսարանի պատմական ֆակուլտետը, որն ավարտել է 1961թ. ստանալով պատմաբանի որակավորում:

Համալսարանը ավարտելուց հետո 1961-1963 թվականներին աշխատել է կոմերիտական կազմակերպության մարմիններում, 1963-1966  թվականներին' Հայաստանի կոմկուսի Սպանդարյանի շրջկոմում, 1966-1967 թվականներին' Հայաստանի կոմկուսի Երեւանի քաղկոմում' սկզբում գիտության եւ ուսումնական հաստատությունների կազմակերպական բաժիններում, իսկ հետո' ագիտացիայի եւ պրոպագանդայի բաժնում որպես բաժնի վարիչի տեղակալ: 1977թ. ընտրվել է Եւրեւանի քաղաքային խորհրդի գործկոմի պատասխանատու քարտուղար եւ 14 տարի աշխատել է այդ պաշտոնում մինչեւ 1991թ.: Երեւանի քաղխորհրդում աշխատանքի ընթացքում հաճախ որպես պատվիրակության ղեկավար ներկայացրել է Երեւանը արտասահմանյան երկրներում:

1989 թվականից' սկզբում որպես ավագ դասախոս, իսկ 1993  թվականից' որպես ՀՊԱՀ -ի պրոֆեսոր, մինչեւ 2003թ. ՀՊԱՀ -ի  հայոց պատմության եւ փիլիսոփայության ամբիոնում դասավանդել է «Հայոց Պատմություն» եւ «Քաղաքագիտություն» առարկաները:

2003 թվականին Ալեքսեյ Մակարյանը ընտրվել է Հայաստանի պետական ագրարային համալսարանի «Հայոց պատմության եւ փիլիսոփայության» ամբիոնի վարիչ եւ աշխատել է մինչեւ 2006թ.

2009 -2012 թթ Ալեքսեյ Մակարյանը աշխատել է Խ. Աբովյանի անվան մանկավարժական համալսարանի Կուլտուրայի ֆակուլտետի մասսայական հանդիսությունների ռեժիսյուրայի եւ մշակութաբանության ամբիոնում որպես պրոֆեսորի պաշտոնակատար:

Ներկայումս Ալեքսեյ Մակարյանը աշխատում է մի շարք ուսումնական ձեռնարկների եւ դասագրքերի վրա, ինչպես նաեւ հավաքագրում եւ մշակում  է մշակութաբանության բառարան:

Ալեքսեյ Մակարյանը ամուսնացած է, ունի երկու երեխա, որոնք բնակվում են ԱՄՆ-ում:

Գիտական ձեռքբերումները

1976թ. Ալեքսեյ Մակարյանը պաշտպանել է թեկնածուական թեզ Երեւանում, իսկ 1993թ.' դոկտորական թեզ Սանկ Պետերբուրգում եւ ստացել պատմական գիտությունների դոկտորի կոչում:

Մակարյանի թեկնածուական եւ դոկտորական ատենախոսությունները, մենագրությունները եւ գիտական հոդվածները նվիրված են երկրորդ համաշխարհային պատերազմի տարիներին Հարավային Կովկասի եւ մասնավորապես, Հայաստանի պատմությանը, Հարավային Կովկասի հանրապետությունների քաղաքական, հասարակական կազմակերպությունների գործունեությանը, նրանց դերին ֆաշիստական Գերմանիայի դեմ պայքարելու համար երկրամասի ժողովուրդներին համախմբերու գործում, հայ ժողովրդի մասնակցությանը պատերազմին:

Ալեքսեյ Մակարյանը բազմիցս հրավիրվել, մասնակցել եւ զեկուցումներով հանդես է եկել Հայաստանի հանրապետությունում եւ նախկին Խորհրդային Միության այլ հանրապետություններում, Ռուսաստանի Դաշնությունում կազմակերպվող գիտաժողովներին, Ռուսաստանի պատմաբանների հետ համատեղ տպագրել հոդվածներ,  հանդես է եկել որպես թեկնածուական եւ դոկտորական ատենախոսությունների ընդդիմախոս, խմբագրել 1915թ. հայոց ցեղասպանությանն վերաբերող երեք աշխատություն:

Եղել է ՀՊԱՀ-ի մի շարք ֆակուլտետների, հեռակա ուսուցման բաժանմունքի գիտական խորհուրդների անդամ:

Գյուղատնտեսական ակադեմիայի գիտական խորհրդի որոշմամբ Ալեքսեյ Մակարյանին շնորհվել է պրոֆեսորի կոչում:

Ալեքսեյ Մակարյանը պարգեւատրվել է «Պատվո նշան» շքանշանով, մեդալներով եւ պատվոգրերով: